ALBORADA DE EDIPO

Despois de Sófocles terlle dado forma canónica ao tema ou , mellor dito , ao misterio de Edipo , sucéndense ao longo da Historia de Europa, e de forma máis ou menos continua , outras visións do dito misterio : desde Séneca , no século I d.C. até Heiner Müller , na segunda metade do XX , pasando por Corneille , Cocteau , Yeats ou Gide , por citarmos só algúns nomes . Tamén os músicos , os pintores e os cineastas teñen sentido a chamada do drama e , naturalmente , os directores de escena , que continuúan aportando innúmeras olladas da que é , talvez , a creación máis próxima á natureza humana . Ademais das obras dos escritores e dos artistas , desde mediados do século XIX vimos asistindo a un tratamento científico do caso ; mitólogos , antropólogos , filólogos e mesmo psiquiatras procuran con cadansúa ferramenta unha explicación do dito misterio , no só indagando nas orixes do mito , mais tamén tratando de reduciren a figura de Edipo a un definitivo significado .