FEDERICO GARCIA LORCA EN SANTIAGO DE COMPOSTELA

Santiago de Compostela deixou fascinado a Federico García Lorca . Descobre a cidade con 18 anos , durante unha viaxe de estudos por Galicia , e axiña escribirá : << Esto me hipnotiza >>. Regresará a Compostela tres veces máis , todas no ano 1932 , ben como conferenciante , tamén como director de La Barraca e sempre como famosísimo poeta . En Santiago será recibido , arroupado e agasallado coa admiración e a sincera amizade de toda unha xeración de estudantes e intelectuais que , naquel ano de ouro da República , izan as rúas da medieval cidade coa súa ansia de cultura , galeguismo e liberdade . Lorca dá a coñecer aquí algúns dos versos inéditos de Poeta en Nueva York , debuxa , canta e toca o piano no Hotel Compostela , vivirá unha memorable noite teatral na Quintana e será retratado por Carlos Maside e Luís Seoane . En decembro de 1835 sairán publicados en Santiago os Seis poemas galegos , esa impagable ofrenda literaria que o granadino lle tributará á nosa lingua e cultura . O presente libro camiña con Lorca polas rúas da cidade nun detido relato a modo de crónica que revive estes días únicos . Tamén recolle as impresións do poeta cando regresa a Madrid , ou durante a súa estadía en Bos Aires , onde falará de nós con enorme entusiasmo . Este volume achega numerosos datos e máis de setenta ilustracións e documentos , boa parte deles moi descoñecidos . E conclúe co rescate de valentes testemuños que , despois do seu asasinato , teimaron por manter viva , durante a longa noite de pedra , a memoria deste eterno Lorca en Compostela .